سرائیکی زبان دا قومی ݙین٘ہ

٢٢ نومبر کوں سرائیکی زبان دا قومی ݙین٘ہ منایا ویسی، جِتھاں سرائیکی زبان دے فروغ دے مطالبے تے کامیابیاں کوں اجاگر کیتا ویسی۔ ایہ ݙین٘ہ سرائیکی وسیب دے لوکاں کیتے اپنی ثقافت، زبان تے تشخص دی عظیم اہمیت دی علامت ہے۔

کامیابیاں:

سرائیکی تحریک دی انتھک محنت تے جدوجہد دے نتیجے اچ کئی اہم مطالبے پورے تھئے ہن:
1. پنجاب تے کے پی کے اچ سرائیکی پارلیمانی زبان بݨ ڳئی ہے، جیہڑا ہک تاریخی قدم اے۔ ایہ سرائیکی زبان کوں سرکاری سطح تے عزت ݙیوݨ دے عمل اچ اہم سنگ میل ہے۔
2. ایف اے سطح تے سرائیکی دی کتاب چھپ ڳئی ہے، جیہڑا نوجواناں کوں اپݨی زبان تے ادب نال جوڑݨ دا ذریعہ بݨسی۔ ایہہ قدم سرائیکی ادب تے تاریخ کوں اڳتیں ودھاوݨ اچ مددگار ثابت تھیسی۔
3. دیرہ اسماعیل خان تے ٹانک اچ پہلی جماعت کنوں سرائیکی زبان لازمی مضمون بݨاوݨ، سرائیکی زبان دی حوصلہ افزائی تے اگلی نسل اچ سرائیکی زبان دے فروغ کیتے ہک اہم کامیابی ہے۔

نویں مطالبے:

سرائیکی وسیب دے لوک ایں ݙین٘ہ دے موقعے تے ٻئے مطالبے وی پیش کریسن جیہڑے سرائیکی زبان دے حق اچ ہن:
١۔ قومی اسمبلی تے سینیٹ اچ سرائیکی کوں پارلیمانی زبان بݨاؤ تاکہ قومی سطح تے سرائیکی زبان دی نمائندگی تھیوے۔۔
٢. سرائیکی کوں قومی زبان دے طور تے تسلیم کرݨ کیتے بل دی منظوری، ایہہ بل قومی اسمبلی تے سینیٹ وچوں منظور کروایا ونجے تاکہ سرائیکی زبان کوں دیگر قومی زباناں نال برابری دا درجہ ملے۔
٣. چھیویں جماعت کنوں میٹرک تائیں سرائیکی کتاباں چھاپݨ دی کوشش کیتی ون٘ڄے تاکہ بچے سرائیکی زبان تے ثقافت نال مضبوط رشتہ قائم کرسڳن۔
٤. باقی سرائیکی وسیب وچ وی پہلی جماعت کنوں سرائیکی لازمی مضمون بݨاون تاکہ سرائیکی بچے اپنی مادری زبان اچ تعلیم حاصل کر سڳن۔
سرائیکی وسیب دے لوکاں دی ایہ تحریک نہ صرف زبان دا تحفظ بلکہ اپنی ثقافتی شناخت کوں برقرار رکھݨ دی ہک مضبوط مثال ہے۔