فلسفہ سرائیکستان
سرائیکستان دے ستارھاں ضلعے ہن، سرائیکستان وچ راہوݨ آلا ہر فرد سرائیکی ہے، بھانویں او گھر وچ کوئی ٻئی زبان، پشتو، بلوچی، سندھی، پنجابی ٻولے۔ سرائیکستان دے ستارھاں ضلعیاں دے ساڈھے چار کروڑ لوک سرائیکی ہن تے سرائیکی فلسفے تے یقین رکھدے ہن۔
نظریۂ سرائیکستان
نظریۂ سرائیکستان سرائیکی وسیب دی زبان، ثقافت، تاریخ، شناخت، وسائل تے سیاسی حقاں دی حفاظت تے ترقی دا نظریہ ہے۔ ایں نظریے دا بنیادی مقصد سرائیکی وسیب دے لوکاں کوں آئینی تے جمہوری طریقے نال اپݨے سیاسی، انتظامی، معاشی تے ثقافتی حق حاصل کرواوݨ تے صوبہ سرائیکستان قائم کرݨ ہے۔
نظریۂ سرائیکستان سرائیکی زبان کوں تعلیم، سرکاری کم کار تے عوامی زندگی وچ جائز مقام ݙیوݨ، وسیب دے قدرتی تے مالی وسائل تے منصفانہ حق یقینی بݨاوݨ، پسماندگی ختم کرݨ تے تعلیم، صحت، روزگار تے صنعت دی ترقی تے زور ݙیندا ہے۔
ایہ نظریہ نفرت یا کسی قوم دے خلاف نئیں، بلکہ امن، جمہوریت، آئین، برابری، ثقافتی شناخت تے وسیب دی خوشحالی اُتے یقین رکھدا ہے۔
نظریۂ سرائیکستان دے پنج بنیادی نکات
١۔ سرائیکی قومی شناخت:
سرائیکی زبان، ثقافت، تاریخ تے وسیب دی مشترکہ شناخت کوں سرائیکی قوم دی بنیادی پہچان منݨ۔
٢۔ سرائیکی زبان دے حقوق:
سرائیکی کوں تعلیم، سرکاری کم کار، عدالتی نظام، میڈیا تے دفتری معاملات وچ وسیع تے عملی حق ݙیوݨ۔
٣۔ سیاسی خوداختیاری:
سرائیکی وسیب کیتے آئینی تے جمہوری طریقے نال صوبہ سرائیکستان دی تشکیل دی جدوجہد کرݨ۔
٤۔ وسیب دی معاشی ترقی:
وسیب دے قدرتی وسائل، زرعی پیداوار تے سرکاری ترقیاتی وسائل دا منصفانہ حصہ وسیب دی تعلیم، صحت، روزگار تے بنیادی ڈھانچے تے خرچ کرݨ۔
٥۔ پرامن تے جمہوری جدوجہد:
سرائیکستان دے مطالبے کوں آئین، قانون، ووٹ، سیاسی عمل، عوامی رابطے تے پُرامن جدوجہد دے ذریعے اگوں ودھاوݨ۔
